శ్రీ హనుమద్వ్రతము – 26th Dec, 2012 – బుధ వారము

ఆత్మీయ బంధువులారా!

శ్రీ హనుమద్వ్రత శుభాకాంక్షలు.

మాసానాం మార్గశీర్షోహం అని భగవద్గీతలో శ్రీకృష్ణ పరమాత్మ తాను మార్గశీర్ష మాసమని చెప్పారంటే ఆ మాసంయొక్క విశిష్టత ఎట్టిదో అర్థమౌతుంది. విశేషించి హనుమంతుని సీతాన్వేషణ జరిగింది ఈ మాసంలోనే. అరటితోటలో హనుమంతునకు పూజచేస్తే తప్పక ఆ స్వామి అనుగ్రహం చేకూరుతుంది. అందునా మార్గశీర్షంలో శనివారమునాడు హనుమంతుని కదళీవనమున ఆరాధించి అందే శ్రోత్రియులకు అన్నసమారాధన మొనర్చిన తప్పక అతని నను గ్రహించి సర్వకామ్యము లీడేర్చునని పరాశులవారు చెప్పినారు. ఆ మాసమునందు శుధ్ధత్రయోదశి ప్రధానమైనది.

మార్గశీర్షే త్రయోదశ్యాం – శుక్లాయాం జనకాత్మజా |
దృష్ట్వా దేవీ జగన్మాతా – మహావీరేణ ధీమతా ||

అని చెప్పబడుటచే ఆ దినముననే హనుమంతుడు సీతాదేవిని చూచినాడు. కావుననే ఆరోజు హనుమంతుని పూజించినవాని కోరిక లీడేరి దుఃఖనివృత్తి యగునని సీతామతల్లి వరమొసగినది. మృగశిరానక్షత్రము హనుమంతున కిష్టమైనది. ఆ నక్షత్రముకల ఆదివారమున భీముడు, ఆ నక్షత్రముకల ఆశ్వయుజ మాసమున ద్రౌపదియు హనుమంతు నారాధించి వరము నందుటవలననే అవి హనుమత్పర్వదినము లైనవి. అటువంటి మృగశిరానక్షత్రము పౌర్ణమినాడు ఉండు మాసమే మార్గశీర్షమాసము. కావున ఆ మాసము హనుమత్ప్రీతికరము. మార్గశిర మాసమున శుధ్దత్రయోదశి హనుమద్వ్రతము. అట్టి వ్రత మాచరించి స్వామియనుగ్రహమునకు పాత్రులైన సోమదత్త, నీలాదులెందరో కలరు. వారివలనే హనుమద్భక్తులెల్లరు హనుమద్వ్రత మాచరించి ఐహిక పారమార్థిక ప్రయోజనములంది ధన్యులు గావచ్చును.